Sulod sa daghang henerasyon, ang mga miyembro sa Ang Simbahan ni Jesukristo sa mga Santos sa Ulahing mga Adlaw naningkamot sa pagsunod sa sugo sa Manluluwas nga “higugmaa ang imong isigkatawo” (Mateo 22:39) pinaagi sa pag-atiman sa mga tawo nga nanginahanglan. Ang Sentral nga Balay Tipiganan sa Bishop adunay dakong papel niana nga paningkamot.

Aron matubag ang dihadiha nga mga panginahanglan, ang Simbahan nagpadagan og lima ka sentral nga balay tipiganan sa bishop nga nagsuplay sa gatosan ka tipiganan sa mga bishop sa lokal nga lebel. Dayon ang mas gagmay nga mga balay tipiganan mohatag og tabang sa mga indibidwal ug mga pamilya pinaagi sa mga referral gikan sa usa ka lokal nga lider sa Simbahan, nga gitawag og bishop. Ang tanang pagkaon ug mga suplay gihatag nga libre ug nahimo pinaagi sa manggihatagon nga mga donasyon sa mga miyembro sa Simbahan. Ang mga miyembro tradisyonal nga magpuasa matag bulan sulod sa duha ka kan-anan, unya mohatag sa kantidad niini nga mga pagkaon ngadto sa katuyoan sa pagtabang sa mga tawo nga nanginahanglan.

Ang Sentral nga Balay Tipiganan sa Bishop sa Siyudad sa Salt Lake mao ang labing dako sa lima ka sentral nga mga balay tipiganan. Kini nagtipig og 143 ka presko ug delata nga mga pagkaon uban sa mga produkto nga pang-hygiene, mga gamit sa pagpanglimpyo, ug mga dayaper. Ang pasilidad nagsuporta sa dinagkong distribusyon gamit ang grupo sa dagkong mga semitrak ug 44 ka loading dock. Kon gikinahanglan, kini magsilbi nga sentro sa pagpadala og mga suplay nga pang-emerhensiya ngadto sa mga lugar nga naapektohan sa natural nga mga kalamidad. Bisan og kini nga balay tipiganan dili abli alang sa publiko nga mga paglibot, kini nagbarog isip usa ka importante nga bahin sa nagpadayon nga trabaho sa Simbahan sa pagtabang ug pagsuporta sa mga tawo nga nanginahanglan.

Pagkat-on og dugang mahitungod kon sa unsang paagi ang Simbahan nag-atiman alang niadtong nanginahanglan.