Ang Salt Lake Temple usa ka lugar diin ang mga tawo nakakaplag og kalinaw, paglaom, ug kalipay diha ni Jesukristo sukad nga kini orihinal nga gipahinungod niadtong 1893. Dili sama sa mga meetinghouse sa simbahan diin ang sinemanang pagsimba gihimo, ang mga templo sagrado nga mga lugar diin ang mga miyembro sa Ang Simbahan ni Jesukristo sa mga Santos sa Ulahing mga Adlaw mas magpaduol sa Dios pinaagi sa espesyal nga mga seremonya nga naka-focus Kaniya ug sa Iyang plano sa kalipay. Ang templo mao usab ang dapit diin ang mga pamilya magkahiusa hangtod sa kahangtoran, nga nagtanyag og paglaom nga ang mga minahal mahimong magkauban hangtod sa kahangtoran.

Ang Salt Lake Temple may gitas-on nga 67.67 ka metros, nga gibutangan sa ibabaw sa estatuwa ni anghel Moroni (usa ka pigura sa Basahon ni Mormon) nga nagtudlo paingon sa langit. Ang komplikado nga mga kinulit nga bato, sama sa mga bituon, adlaw, ug mga porma sa bulan nagpahinumdom kanato sa saad sa Dios nga giyahan ang Iyang mga anak balik ngadto Kaniya pinaagi ni Jesukristo.

Tungod kay ang templo giisip nga balay sa Ginoo, sa higayon nga kini pormal nga gipahinungod ngadto Kaniya, dili na kini abli alang sa publiko. Aron makasulod, ang mga miyembro sa Simbahan magdala og rekomendasyon gikan sa ilang lokal nga eklesiyastikanhong mga lider sa simbahan nga nagpakita nga ilang nasabtan ug gisunod ang mga prinsipyo sa ilang pagtuo sa inadlaw-adlaw nga kinabuhi. Ang tanan gidapit sa paglakaw-lakaw sa palibot ug mobati sa kalinaw niining balaan nga dapit.