Ang Sentro sa Humanitarian natukod niadtong 1991 sa Ang Simbahan ni Jesukristo sa mga Santos sa Ulahing mga Adlaw. Bisan og ang sentro milambo sa paglabay sa panahon, ang mga prinsipyo niini nagpabilin nga parehas: pag-atiman sa mga nanginahanglan, pagpalambo sa pagsalig sa kaugalingon, ug pag-awhag sa serbisyo.

Matag tuig, ang sentro mokuha og gatosan ka bag-ong mga empleyado aron moagi sa pagbansay sa trabaho, nga naglakip sa mga oportunidad sa pagkat-on og mga kahanas sama sa produksyon, operasyon sa forklift, food service [pag-andam, paghatod, ug pagsilbi], custodial ug maintenance nga trabaho. Ang mga kaubanan mobahig ug moproseso sa mga sobra nga donasyon gikan sa mga tindahan nga ubos og presyo [thrift stores] sa Deseret Industries, nga ipang-apod-apod alang sa humanitarian nga tabang, ibaligya ngadto sa ubang mamalitay og recycle, o i-recycle kon dili na magamit sa paningkamot nga maampingan ang kalibotan.

Ang programa sa pagbansay sa trabaho makatabang sa pag-andam sa mga kaubanan alang sa pangempleyo samtang gitugotan sila nga makasarang alang sa ilang kaugalingon ug sa ilang mga pamilya. Daghang kaubanan, kasagaran mga tawo nga nangita og kadangpan gikan sa ubang nasod, ang nag-apil sa mga klase sa Ingles. Isip kabahin sa binayran nga pagbansay sa trabaho, ang sentro nag-andam ug nagpadala og minilyon nga mga butang ngadto sa mga indibidwal ug mga komunidad nga nanginahanglan sa tibuok kalibotan. Kini nga mga butang naglakip sa mga suplay sa emerhensiya, mga hygiene kit, mga gamit sa eskwelahan, mga quilt, ug nagamit na nga mga bisti.

Ang trabaho nga gihimo sa Sentro sa Humanitarian kabahin sa mas dakong paningkamot sa pagtuman sa ikaduhang dakong sugo nga gitudlo ni Jesukristo: “Higugmaa ang imong isig katawo sama sa imong kaugalingon” (Mateo 22:39).

Pagkat-on og dugang mahitungod kon sa unsang paagi ang Simbahan nag-atiman sa mga nanginahanglan.